अमिताभ बच्चन ‘दरवाजा बंद’चे सदिच्छा दूत

बिग बी अमिताभ बच्चन यांच्या नावाचाही सामाजिक कार्यात नेहमी पुढाकार घेणाऱ्या आणि भारत सरकारतर्फे उपक्रमांचा प्रचार करण्यासाठी पुढे सरसावणाऱ्या अभिनेत्यांच्या यादीत समावेश होतो. बिग बी किंबहुना या यादीत अग्रस्थानी आहेत असेच म्हणावे लागेल. बिग बींचा भारत सरकारतर्फे राबवण्यात आलेल्या ‘पोलिओमुक्त अभिनयाना’पासून ते ‘स्वच्छ भारत’च्या प्रमोशनपर्यंत सर्वच उपक्रमांत सहभाग पाहायला मिळाला होता. त्यांची आता आणखी एका उपक्रमाच्या सदिच्छा दूतपदी नेमणूक करण्यात आली आहे.

मंगळवारी केंद्र सरकारने देशभरात शौचालयांचा वापर वाढावा या उद्देशाने ‘दरवाजा बंद’ या उपक्रमाचे अनावरण केले. अधिकाअधिक लोकांपर्यंत हा उपक्रम पोहचवण्यासाठी सर्वांच्या मनात स्थान मिळवलेल्या अमिताभ बच्चन यांची सदिच्छा दूतपदी निवड करण्यात आली आहे. हा उपक्रम ‘स्वच्छ भारत अभियाना’अंतर्गत राबवण्यात येत असून मुंबईत एका कार्यक्रमात त्याचे अनावरण करण्यात आले. महाराष्ट्राचे मुख्यमंत्री देवेंद्र फडणवीस, केंद्रीय स्वच्छता आणि पेयजल मंत्री नरेंद्र सिंह तोमर यांनीही या कार्यक्रमात हजेरी लावली होती.

जागतिक बँकेने या उपक्रमात अर्थसहाय्य पुरवले असून त्यात सामान्य जनतेनेही सकारात्मक सहभाग घेणे अपेक्षित आहे. स्वच्छतेचे महत्त्व आणि त्यासाठी महत्त्वाचा असणारा शौचालयाचा मुद्दा या उपक्रमाअंतर्गत अधोरेखित केला जाणार असून शौचालयांचा वापर वाढवण्यासाठी जनजागृती करण्यावर भर दिला जाणार आहे.