दाढी करायला नकार, पत्नीने गरम पाणी ओतले

उत्तर प्रदेशमधील अलिगढ येथील एका २५ वर्षीय मुस्लिम महिलेनं पती दाढी करत नाही, म्हणून त्याच्या अंगावर उकळते पाणी ओतल्याची घटना समोर आली आहे. दाढी करून आपल्या पतीनेही स्मार्ट दिसावं यासाठी ती आग्रही होती. पतीच्या खूनाचा प्रयत्न केल्याचा आरोप लावत पोलिस ठाण्यात तिच्या विरोधात गुन्हा दाखल करण्यात आला आहे.
जमालपूर भागात राहणाऱ्या ३२ वर्षीय सलमान खानचे नगमाशी सहा महिन्यांपूर्वीच लग्न झाले होते. आयुष्य जगण्याविषयी दोघांचे विचार वेगळे असल्याने दोघांमध्ये सतत वाद होत. धार्मिक विचारांचा सलमान आपल्या धार्मिक प्रथा-परंपरांनुसारच जीवन जगू इच्छित होता, तर पत्नी नगमा आधुनिक जीवनशैली अवलंबू पाहत होती. त्यासाठी नगमा सतत सलमानला आग्रह करी. तिला वाटायचे की आपल्या पतीने दाढी करून स्मार्ट दिसावं. त्याने कुर्ता-पायजमा ऐवजी मॉर्डन शर्ट-पॅण्ट घालावं.

शुक्रवारी याच मुद्द्यावर दोघांमध्ये पुन्हा वाद झाला, आणि ह्यावेळेस हा वाद इतका टोकाला गेला की रागाच्या भरात नगमाने झोपलेल्या सलमानच्या अंगावर उकळते पाणीच ओतले. यात सलमान २० टक्के भाजला असून त्याचा चेहरा आणि हात जळाला आहे. सलमानने आरडाओरड केल्यानंतर तिथे आसपासचे लोक गोळा झाले आणि त्यांनी त्याला हॉस्पिटलमध्ये नेले. सध्या सलमावर उपचार सुरू असून त्याला २-३ दिवसात सोडण्यात येईल, असे जे एन मेडिकल कॉलेजचे वैद्यकीय अधीक्षक हैरिस मंजूर अली यांनी सांगितले. या प्रकरणी आरोपी महिलेवर हत्येचा गुन्हा दाखल केला गेला असून पुढील चौकशी सुरू असल्याचे अलिगढचे पोलिस अधीक्षक आशुतोष द्विवेदी यांनी सांगितले.